-Dərmanlarınızı həkiminizdən soruşmadan dəyişməyin və ya kəsməyin.
-Diabet məktəbində dərslərə və kontrollara müntəzəm gəlin, təlimatlara dəqiq əməl edin, bilmədiklərinizi soruşun, qəbula gəlmədən öncə və unudulmasın deyə suallar barədə qeyd aparın.
-Nizamlı şəkildə qan şəkərinizi yoxlayın və qeyd edin.
-Altı ay fasilə ilə kardioloq müayinəsindən keçin.
-Ən geci ildə bir dəfə gözlərinizi müayinə etdirin.
-Fiziki fəallığı unutmayın, bu sağlamlığın üçün çox vacibdir.
-Əgər nəfəsalma zamanı çətinlik çəkirsinizsə, öskürürsünüzsə, mütləq döş qəfəsinin rentgen müayinəsindən keçin, çünki idarə edilməyən diabet ağciyər vərəminin inkişafına səbəb olur. Peyvəndə qarşı əks göstəriş yoxdursa, hər il qış aylarında qrip peyvəndi olunun.
-Türkəçarələr (fitoterapiya, bioloji aktiv əlavələr və s.) yaxud müasir elmi standartlara istinad olunmadan aparılan müalicələrlə qiymətli vaxtınızı itirməyin, qan şəkərinizi acqarına və toxqarına ölçun, qeydlərinizi həkiminizə göstərin, özünüzü işin mütəxəssisinə etibar edin.
-Müntəzəm şəkildə diş həkiminə gedərək müayinədən keçin.
-Ayaqlara qulluq diabet xəstələrində çox ciddi və incə yanaşma tələb edən məsələdir. Hər gün ayaqlarınızı ilıq su və sabunla yuyun, qurulayın.
-Dırnaqlarınızı uzun və düz kəsin, çalışın zədələməyin və pambıq corab, evdə tərlik, ortopedik ayaqqabı geyinin, ayaqlarınıza krem çəkin, sıyrıntı, yara, çat görsəniz dərhal həkimə müraciət edin. Diabetik pəncə problemi vaxtında aşkar və düzgün müalicə edilərsə, bu tam həllolunan məsələdir.
Şəkərli diabetli xəstələrin müalicəsində “Diabet məktəbi” mühüm yer tutur. Burada xəstələrə özünənəzarət, pəhriz, insulin müalicəsi zamanı diqqət edilməli olan məqamlar, qan şəkərinin ölçülməsi qaydaları, ayaqlara qulluq və s. öyrədilir. Biz diabet dərsləri zamanı əyani vəsaitlərdən də (slayd, videofilmlər və s.) istifadə edirik. Diabet dərslərinə gəlmək sizin üçün faydalıdır. Çünki nəticədə şəkərli diabetin müalicəsi yuxarıda göstərilən şərtlərə əməl edən, xəstəliyinə biganə yanaşmayan, bu xəstəliyi və ağırlaşmaları anlayaraq yalnız mütəxəssis həkim-endokrinoloq nəzarəti altında etdirən şəxslərdə uğurlu ola bilər.
